Carpan, Radar Madura, Ramlig

Neng Gilma

2.5
(2)

“UMMI, kaula terro apala Al-Qur’an. Lebur, Mi. Malemma kaula nenggu dibi’ e TV. Poko’na lebur pon. Ganeka olle juara settong. Hadiah-na, obang saratos juta, olle ongkos umrah sakaluarga, eppa’ ban emma’na. Badha pole, Mi, ganeka olle mobil raja. Poko’na kaula terro padhana oreng garowa,” oca’na Gilma ka ummina.

“Nyaman, mon la jareya pangaterrona ba’na. Tape, ba’na mon terro nga’ rowa kodu mondhuk, Na’. Kan ba’na la tao, ummi ta’ andhi’ pesse kaangguy abandhai ba’na. Kemma pessena pondhugga, pessena tahfidda. Mon ummi, terrona ba’na gun mondhuk ma’le padha ban ana’na tatangga,” ummina Gilma katon nges-marenges ngedhing pamentana ana’na se bine’. “Dina, engko’ arambaga gallu ban pamanna ba’na. Ta’ kera burung, paggun se tolos mondhuk,” ummina Gilma pas maso’ ka kamarra.

Nyamana Gilma gi’ na’-kana’ saomoran kellas ennem SD, ta’ tao ja’ ummina se maso’ ka kamarra ta’ kowat ngampet aeng mata se agili derres, saenggana pas maso’. Karana Gilma ta’ ngarte apa, nyangkana ummina se buru rowa katon coma maso’, tadha’ se laen. Polana ummina ce’ abidda ta’ kalowar, Gilma pas mangkat amaen ban kancana se laen.

Ummina se maso’ kamar sambi ngabas Gilma dhari kaca romana se amaen sakanca’an e taneyanna. Aeng mata sajan ce’ derressa polana ummina Gilma tako’ masake’ atena ana’na se andhi’ pangaterro tenggi. Etorote berra’, ta’ etorote masake’ atena.

“Samoga, ya Allah. Samoga mampo norote ponapa se daddi pangaterrona ana’. Salaggi’ neyat bagus badha, abdina partaja Ajunan paste abanto,” ummina Gilma pas ngosap aeng matana se ngalocor.

***

Sabban are sabban malem, Gilma, na’-kana’ se raja pangaterrona maso’ tahfid terros neggu’ Al-Qur’an sambi eapalagi molae dhari rat-sorat pandha’. Ummina pas ta’ tega mon ta’ etoroda pangaterrona. Banne polana ummina alarang, tape masala bandha se korang kaangguy bisa maso’ tahfid. Maskeya la dhari ta’ mampona, ummina Gilma paggun ta’ alarang ngapalagi’.

Settong bakto Gilma dhateng ka ummina se toju’ e korsena amperrra roma.

“Mi, kaula pon para’ lulusa SD. Kadiponapa, tolos kaula mondhuk sambi maso’ tahfid?” Gilma sambi neggu’ tanangnga ummina se toju’ kadibi’ e korse.

“Iya, paggun tolos, Na’. Keng pangaterrona ba’na mondhuk dhimma, Na’?” Ummina pas mesem ka Gilma.

“Mon kaula, terrona mondhuk ka se paleng jau ma’ ta’ lako paleman ka compo’. Padhana Mbak Indah, Sasa, Nurul, ban Mbak Laili se sataretan padha mondhuk e Jaba ban sambi maso’ tahfid. Kan sataretan rowa paleman sakaleyan dhalem sataon bila bulan powasa.”

“Barampa biayana ca’na?”

“Emm… katon gun sajuta satengnga, Mi. Ganeka sabban bulan.”

Baca juga  Kalambi Anyar

Ngedhing ja’ biayana raja, ummina Gilma pas nondhu’ katon ta’ mampo onggu kaangguy mamondhuk ana’na ka Jaba. Epaburung neser tako’ kare ngarep, eterrosagi, biayana se korang.

“Mon gun sajareya, insyaallah ummi mampo,” oca’na ummina Gilma sambi nondhu’ tako’ etemmo ja’ aeng matana ngalocor pole polana ngedhing biaya se katon ta’ mampo majar dhaggi’.

“Dinala, ummi maso’a ka kamar gallu,” ummina Gilma pas berka’ tako’ sampe’ etemmo ja’ aba’na nanges.

Pas Gilma mekker, “Arapa ma’ ummi bila ecatore pondhuk seggut buru kaadha’, ja’ gi’ ta’ mare. Badha apa ya? Arapa mon pas tenggu ka kamarra bai, kan pas bisa tao. Ella, ma’ pas katon cangkolang. Dinala amaen bai,” oca’na Gilma dhalem atena.

***

“Mi, aponapa ma’ katon posang samangken? Bida ban ri’-bari’na se biyasana samangken pon asaren. Aponapa, Mi?” Gilma se la agellu’ guling ngoca’ ka ummina se posang.

“Ba’na tedhung kaadha’ bai. Dina ummi paggun tedhung keya dhaggi’, ano la banne na’-kana’ pole,” ummina Gilma paggun ngabas ka kacana romana se ella abukka’.

“Enggi pon, Mi, kaula tedhunga kaadha’.”

Ummina Gilma paggun toju’ sambi ngantos taretanna se gi’ ta’ dhateng. Padahal taretanna soro paceppet entar sopaja mare sadaja masala. Polana, Gilma la kare samenggu se mangkata ka pondhuk. Ta’ abit semmo se ngantos, temmo la ngolok salam e lowar reng ka tello se sakabbinna aropa’agi pamanna Gilma ban ale’ dhari ummina.

“Buk, ca’na Gilma terro maso’a tahfid?” tanyana Ahmad, pamanna Gilma se gi’ ta’ abine.

“Iya, Le’. Mara dha’ramma re? Nyamana engko’ reng ta’ andhi’, apa pas se ekasangowa ka pondhuk dhaggi’?” Ummina Gilma sambi nyaba’ kobi se mare eberri’ biddang.

“Terrona Gilma keng mondhuga kamma?” atanya Lukman dha’ embugga.

“Ano, ca’na, Le’, terro ka Jaba’a, apolonga ban ana’na Suliana se e temorra roma.”

“Aggu! Mampo kerana ba’na, Buk? Ma’ pas nerowana reng sogi. Mon sataona engko’, e dhissa’ larang biayana,” rassa tacengnga’ se teba dha’ taretanna ummina Gilma se bungso.

“Iya, Le’. Engko’ mon la jareya tao kabbi. Pas apa se ekagabaya pangapos ka ponakanna reya?” ummina Ghilma posang akadi sella’ e leggana.

“Mon ca’na engko’, nga’ reya bai, Buk, kan sataretan padha ta’ mampona, pamondhuk bai ta’ usa pamaso’ ka tahfid. Mon la badha e pondhuk paste lako ngaji ta’ kera alako se laen,” Ahmad matabar ka embugga se posang.

“Nyaman, Le’, mon pangaterro nga’ jareya. Gan kellar mamondhuk ponakanna ka Jaba, Le’, engko’ ce’ asokkorra ma’le padha moso se laen. Dina engko’ ka taretan ta’ buto pesse, se penteng adu’aagi ka Pangeran samoga kellara mamondhuk maskeya la tadha’ kaka’na,” ummina Ghilma ngabas ka fotona lakena se la tadha’ omor tello taon se tapongkor.

Baca juga  Rasya dan Reina

Arembak se abit gun nyator Gilma, ana’ se andhi’ pangaterro tenggi. Saongguna nyator dhari adha’ sampe’ ambu, Gilma ngedhingagi rembagga paman ban ummina. Sateya Gilma apangrasa ja’ saongguna pangaterrona ta’ patot karana biaya se ta’ kellar. Gilma ngarembeng ban aeng mata. Saamponna ngedhing kabbi ban ta’ sadhar Gilma la ampon nyeddha.

***

Dhapa’ ka are Rebbu, ummina Gilma ban Gilma la padha ranta mangkat ka pondhuk se etojju. Biyasana mon mangkat sateya abareng ban toronna elmo, bannya’ la se ngangguy nga’ jareya bila badha reng mondhuga. Kalaban kabadha’an se sakadarra, Gilma ban ummina mangkat. Biyasana, mon reng mondhuga se ngater tello’ sampe’ empa’ motor, areya se abida’agi antarana reng kottha ban kampong. Tape nyamana Gilma kalowarga se gun kop-cokop kabadha’anna, se noro’ coma ummina kadibi’. Senga ta’ mate lakena, paste ka tello se ajalan, lebur pas mon padha badha.

Gilma la katon neser ka ummina, polana ce’ nekkanna. Tape Gilma paggun mondhuga, karana kalaban mondhuk bisa magampang jalanna rajakke. Ummina Gilma noro’ perak keya polana la para’ dhapa’a ka pondhuk, padahal biaya la nyata-nyata korang kaangguy majar pessena pondhuk. Pekkerra ummina Gilma, kalaban kabadha’an perak, sopaja bisa notope ragu-raguna.

Saamponna dhapa’ ka pondhuk, Gilma ban ummina laju nojju ka kantor pasantrenna kaangguy adaftar daddi santre. Rassa perak, rassa sossa badha kabbi dhalem atena ummina Gilma. Perak polana ana’ tekka hajat. Sabaligga, sossa polana pesse ta’ cokop ekabajar dhaggi’. Sadajana la mare, kare majarra ka pasantren.

“Saponapa bajaranna se kodu ebajar, Ustadzah?” Tanyana ummina Gilma dha’ sala settong ustazah.

“Paneka sadajana kapesseyan sajuta satengnga, Bu’,” ustadzah sambi magi dalubang se la mare eteken ka ummina Gilma.

Kalaban kajujuran, ummina Gilma makalowar pesse se kare sajuta. Jareya la kabbiyanna la tadha’ pole e ettassa. Saongguna ummina Gilma todhus, keng epabaramma’a, la tako’ masake’ atena ana’ se andhi’ pangaterro tenggi. Maske todhus eja-kaja. Atena Gilma ce’ perakka badha e pondhuk ta’ tao ja’ pessena ummina la tadha’, kabbi e pamajhar. Ummina Gilma pas ajanji ka ustadzah bakal alonase kakoranganna e budhi are.

“Iyala, Na’, ummi moleya. Sateya ba’na la badha e pondhuk, daddi pabajeng-bajeng ajar. Insyaallah ba’na re maso’ tahfid bila engko’ ngerem ka pondhuk,” ummina Gilma nanges sambi agellu’ ana’na.

“Enggi, Mi. Senga’ te-ngate e jalan, Mi,” Gilma pas noro’ nanges keya polana ummina nanges. Gilma saongguna la tao sababba ummina nanges, polana gun kellar mamondhuk, tape ta’ kellar mamaso’ ka tahfid.

Baca juga  NEGERI DALAM GAYUNG

***

Gilma ban kanca pondhugga la padha kennal kabbi. Daddi Gilma ta’ padhana santre anyar pole. Settong bakto, Gilma pas enga’ apa se ekarembak kaluargana sabellunna, ban oca’na ummina sabellunna mole dhari pondhuk. Gilma apangrasa saongguna apa se ejanjiyagi mon ummina ta’ kera tekka. Coma mondhuk tape ta’ bisa maso’ tahfid. Meskeya Gilma ta’ bisa, tape usahana ta’ pegga’. Gilma terros nyare jalan kaangguy maso’ tahfid.

E dhalem usahana, Gilma badha se nyokong sopaja maso’ tahfid. Ropana, badha jalan se gampang kaangguy maso’ ka tahfid kalaban syarat apal Al-Qur’an lema juz cokop tadha’ pole. Kalaban usaha se tenggi, Gilma lulus ta’ usa majar. Atena talebat perak, apa se daddi mempena sateya daddi nyata. Ca-kancana kabbi jau mon kare ngapalagi. Biyasana dhalem sabulan Gilma apal empa’ juz. Ustadzana takerjat polana na’-kana’na bida ban se laen.

Kalaban bakto se ceppet, Gilma la dhapa’ ka wisuda tahfidda. Ummina Gilma pas eolok mon ustdzana sopaja entar ka pondhuk. Ummina pas katon tako’ bila la epanggil polana bajaran pondhuk lako lambat malolo, tako’na jareya. Ropana saamponna dhapa’, arassa takerjat onggu polana ana’na la maso’ tahfid ban olle hadiah umrah abareng kaluarga, olle mobil Avanza, ban olle pesse saratos juta.

“Ummi, Gilma samangken ampon ngaolle napa se ekaterrowe. Paneka kaula partaja paste ummi lako adu’aagi kaula. Kaula saongguna ampon oneng ummi ja’ ta’ ngagunge biaya kaangguy kaula. Saporana kaula, Mi, se ampon maberra’ panggaliyanna ajunan. Saporana, Mi,” Gilma sambi ngalongagi kalong tandha pangesto ka ummina se nanges polana perak.

“Saporana ummi keya, Na’, se ta’ bisa abandhai ba’na. Sateya engko’ apangrasa, Pangeran Mahalamba’ ban sadajana pangaterrona manossa etarema kalaban usaha se tenggi. Senga’, Na’, ja’ sampe’ ba’na loppa ka apa se ella ba’na apal karana kalaban jareya ba’na bisa nolong tan-taretanna laggu’ e ajunanna Pangeran,” ummina Gilma sambi mesem se abareng tanges.

“Enggi, Mi, abdina siap,” Gilma pas nyongkem ka ummina se nanges kalaban kaperagan. (*)

Perpustakaan Latee, Minggu, 08 November 2020

RAMLI QAMARUS ZAMAN. Laher e Disa Tondhu’, Kacamatan Ra’as, Songennep. Samangken daddi santre PPA Latee. Ajar e komunitas FORLESTEA ban daddi mahasiswa Instika jurusan IQT/1

Loading

Average rating 2.5 / 5. Vote count: 2

No votes so far! Be the first to rate this post.

1 Comment

  1. Reng madhureh toq se ngerteh

Leave a Reply

error: Content is protected !!